《魚缸博客》最近見到恒指又繼續向上突破，火車頭就梗係阿里巴巴（０９９８８）、騰訊（００７００）同小米（０１８１０），我估計大家都係炒緊係咪有好業績出爐。　　　不過市場面對住幾個問題，第一就係而家美國唔多想減息太多，第二就係美股下跌緊，唔知會唔會影響埋香港呢邊，所以博客係有少少憂慮。　　　關鍵係，恒指今日已經試過上２４６８０，對上一次試過２４６６９都俾人打落來，如果短線恒指都沖唔上２５０００點關口水平，所謂「不上則落」，呢個落點回調幅度相信都幾大下。　　　博客認為，而家似係市場炒緊業績前端，所謂「買預期、賣結果」，業績期過後回落機會都幾大，大家都不得不防。　　　其實點解博客一路都係做緊淡友，主要係因為覺得而家個大市氣氛同經濟環境，完全撐唔起股市表現，呢一輪升市由１月１４日開始，到今日３月１８日，都未見過一個好明顯的回調整固，呢種情況下係咪仲要入市，大家自行考慮清楚啦。　《編者按》本欄搜羅即市傳聞，惟消息未經證實，《經濟通》亦不保證內容之準確性。

送禮活動浪接浪！想緊貼著數活動消息？即Like etnet Facebook專頁！► 立即讚好