《小傳日記》兩會開幕前多得牙侵咁「唔識做」調皮加關稅，為港股做一個下台階，有得落先有得上，然好兩會期間釋放利好消息，彈板完成跳起，裂口一下企埋上２４０００，阿爺都唔使擔心兩會期間有跌市咁唔老黎。　　　正因為大家都知要跌係為咗回升，事實早幾日調整跌市期間，孖屐反而傾向掃貨為主。睇返過去幾日資金流表現，大市只係喺上星期五（２８日）大棍跌７００幾點當日轉淨化流出，其餘上星期四至今日每日都係淨流入，而且上星期五之後，每日淨流入都係一直擴大，今日淨流入更加超過３００億銀。　　　回落期間北水都好捧場，愈跌愈掃貨。以北水愛股中芯（００９８１）為例，今個星期一（３日）仲係跌市期間就維持淨買過千萬股，正係反映愈跌愈接同對兩會嘅信心。至於ＡＴＭ都固然係北水愛股，其中今日ＱＱ（００７００）同巴巴（０９９８８）都同大市一樣裂口破位上，相信唔少同胞都應該心花怒放。　　　返查上面啲炒股論壇，除咗為ＱＱ慶祝之外，更加多人就諗緊高位應該點樣追揸沽。唔少以年計嘅鵝粉都浮上面，持貨三年甚至係七年嘅老粉喺ＱＱ榮登５２０蚊之後就討論仲愛唔愛好。有唔少老粉都戥ＱＱ開心，但係面對高位誘惑都係忍唔著要沽咁啲。以技術面嚟睇今日已經創咗三年半新高，正正到咗國家重拳監管科企嘅２０２１年水位，的確係應該諗諗後市。　　　而近期阿爺態度已經同幾年前１８０度逆轉，仲要開埋座談會，科企有番名分，正路係應該利好，但最大陰影就係外圍牙侵，唔知佢後續點出招係最大憂慮。ＱＱ同大市一樣，留意落返今日裂口頂有無支持，支持到最少兩日，就可以考慮加倉都可以喇，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

etnet榮膺「第九屆傳媒轉型大獎」四大獎項► 查看詳情