《小傳日記》上個星期傳嘅科技大佬見面會真係如期今日開，仲係一大朝早就開始，果然係好事不宜遲。但唔知係咪怕孖屐太過興奮，今次嘅科技民企座談會係閉門會議，一眾傳媒就惟有靠央視、新華社等等官媒嚟攞料，更重要就係為之前傳嘅參與名單點名。　　　因為只有官媒嘅資源，角度方面無得百分百無死角，除咗習大大連同其餘領導人有正面之外，其餘有份到場嘅領袖都只係得背面或者係斜側面。眾所周知，坐埋喺啲邊邊角角旮旯位就寧舍難ｍａｒｋ　ａｔｔｅｎｄａｎｃｅ，就以今次點相方面都考起一眾傳媒行家。　　　原本只有《人民日報》嘅背面相，好在後來終於有央視嘅斜側面影到多少正面，先唔使全行齊齊玩「背多Ｆｕｎ」。有傳媒就返，面向主席枱由右至左起計分別係寧德時代（深：３００７５０）曾毓群、阿里巴巴（０９９８８）馬雲、飛鶴（０６１８６）冷友斌、正泰電器（滬：６０１８７７）南存輝、宇樹科技王興興、新希望（深：０００８７６）劉永好、華為任正非、比亞迪（０１２１１）王傳福、韋爾（滬：６０３５０１）虞仁榮、小米（０１８１０）雷軍以及奇安信（滬：６８８５６１）齊向東。　　　呢一場點名孖屐都睇得相當重要，有無到坐邊排都好重要，事實上美團（０３６９０）王興都在場，不過坐後咗一排就已經唔同身價，不過起碼有到。但相反傳媒就比較集中搵唔到ＱＱ（００７００）馬化騰同百度（０９８８８）李彥宏，疑似兩位都唔喺座談會現場，即時惹來唔少揣測。而奇就奇在疑似冇到嘅呢兩間公司，今日都有公布旗下產品接入ＤｅｅｐＳｅｅｋ，唔知係咪驚冇到會震跌股價，所以就想用近期包生仔嘅「全面接入ＤｅｅｐＳｅｅｋ」大絕嚟撐價。　　　但同人唔同命，ＱＱ全日都叫有得升，但百度全日反而要跌足６％。孖屐係因為百度作為最先發布ＡＩ生成大模型文心一言嘅公司，竟然都要將最王牌嘅搜尋引擎接入ＤｅｅｐＳｅｅｋ，即係間接承認文心一言唔夠人鬥，所以就成為少數宣布接入ＤｅｅｐＳｅｅｋ反而捱沽嘅公司。　　　其實百度聽日收市後公布上年全年業績，績前咁樣跌法都係有啲唔老黎。而今次業績都算係文心一言發布啱啱好一年之後嘅成績審視，但居然百度喺呢個時候宣布接入ＤｅｅｐＳｅｅｋ，根本就係拆自己台，令人對於文心一言業績表現更加睇淡，以至於成份業績都唔敢睇得太好。百度自己都唔堅持用文心，真係連街外人都戥文心唔抵呀，請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

醫護之選 | 維柏健【加拿大關節銷售No.1】指定產品買1送1 (優惠期至25/2/2025)► 了解詳情