《小傳日記》比亞迪（０１２１１）今日突然公布配股，搞到成個汽車板塊都插水，尤其係吉利（００１７５），真係夠黑仔。噚晚吉利隆重推出佢哋嘅高階智駕系統「千里浩瀚」，話呢套系統係國內首個具備Ｌ３量產落地能力嘅智能駕駛方案。按道理，咁勁嘅利好消息應該帶動股價上升，但啱啱撞正比亞迪配股，唔單止冇炒起，仲跌咗成半成，預防吉利股價衝高後都要配埋一份！　　　智慧駕駛技術分Ｌ５到Ｌ１，大家可能有啲迷茫，其實大家目前只需要關心從Ｌ２級升到Ｌ３級嘅技術迭代就可以啦，因為再高級嘅Ｌ４級甚至Ｌ５級，仍然處於理論階段。目前市面上較為普及嘅係Ｌ２自動駕駛，或者可以叫部分自動化。Ｌ２嘅功能主要係輔助駕駛，例如車道保持、全速自適應巡航、自動泊車等等，簡單啲講就係充當助手，唔會「幫你負責」。喺Ｌ２模式下，司機必須全程監控路面情況，雙手唔可以長時間離開方向盤，隨時準備接管車輛。而Ｌ３屬於「條件自動化」，就可以話係「（有條件地）幫你揸車」，喺特定場景下，系統可以完全接管加速、轉向同剎車，司機期間甚至可以睇手機或者傾偈，不過要喺系統發出提示時接管車輛。簡單啲講，Ｌ３同Ｌ２嘅最大分別，就係智駕軟件願唔願意為司機同乘客嘅道路安全負責。　　　吉利口口聲聲話，有力能實現Ｌ３量產，甚至可以真正實現Ｌ３嘅大規模使用，但坦白講句，自動駕駛其實好早以前就已經可行，上年百度無人駕駛的士都已經可以通街走，算唔上咩技術突破，如果技術落地前未掃清障礙，咁Ｌ３最後都會變Ｌ２。首先，最大嘅挑戰就係法律問題。神州只有極少數城市對Ｌ３及以上級別嘅自動駕駛有明確嘅規範，例如北上廣深、武漢等地，而大部分地區對Ｌ３自動駕駛嘅責任界定仍然比較模糊。一旦發生交通事故，究竟係司機、車企定技術供應商負責，到依家都冇統一標準，車主冇法律護盾防身，又點敢放開軚盤？　　　但係如果司機太過追捧智慧駕駛技術，反而又會成為Ｌ３級另一個風險，因為司機係需要隨時接管番架車，但如果司機因為分心睇手機、傾偈，甚至瞓著咗，無辦法即時接管，同樣都會出事。研究顯示，人類平均接管反應時間係２至３秒，但喺高速行駛時，１秒鐘已經足夠釀成事故，「一係唔出事，一係出大事」，呢個亦正係Ｌ３級智駕技術嘅尷尬位。　　　揸車要精神，揸股票都要精神，講番轉頭，唔知今日有股在手嘅你有冇被震走？個人意見，吉利夠現金，截至上年６月底都仲有４１５億銀揸手，而且作為民企尖子融資手段充足，配股唔係唯一手段，無必須要放下身段加入配股潮，股民與其想太多，不如趁低買幾手，短期等衝刺２０蚊關好過。　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

《說說心理話》成年人ADHD專注力不足工作會有何問題？嘉賓建議企業4個層面助有關員工► 即睇