《小傳日記》港股牛氣衝天，今日再升五百幾點，但美團（０３６９０）全日逆市捱沽，一度插水７％。事關京東集團（０９６１８）宣布殺入外賣界，如果商家喺５月之前入駐平台，京東就會提供「全年免佣金」大優惠！其實京東除咗做電商之外，其實物流業務都好耍家，上年開發咗同城閃送服務，送完柴米油鹽下一步送埋外賣，都好合理啫。只不過都２０２５年啦仲要走回頭路送外賣，唔通真係咁好搵？　　　２００８年內地第一家線上外賣平台「餓了麼」誕生，美團外賣喺２０１３年１１月上線，自此內地外賣平台進入戰國時代，科技大廠接二連三下場鬥一番，中小平台都要分一杯羹，最終就只剩餓了麼同美團兩家爭艷鬥麗。而外賣員亦成為神州社會不能忽視嘅一個勞工群體，據中國互聯網絡信息中心和中國飯店協會外賣專業委員會數據，中國網上外賣用戶５﹒４５億人，騎手超１０００萬名，日均配送超８０００萬單。　　　根據艾媒諮詢數據，２０２４年中國線上餐飲外送行業市場規模為１６３５７億元，按年增長７﹒２％，預計２０２７年達１９５６７億元。個餅越做越大，唔怪得知連京東都要來分一杯羹。京東２０２３年收入按年升幅只得３﹒７％，２０２４年全年業績雖然未出，但上半年收入按年增長只得３﹒９％，升幅明顯唔及餐飲外賣業。　　　電商平台愈做愈大，究竟係好事定係壞事？早前，農夫山泉（０９６３３）創辦人鍾睒睒就連發３條朋友圈，砲轟四大電商平台。直指四大電商平台係經濟「絞肉機」，係中小經營戶「周扒皮」。他認為，呢啲平台搞到大眾喪失創造財富嘅機會，大量中小商家正失去或已經失去公平競爭嘅能力，大量就業機會被平台擸走。雖然鍾睒睒無提及四大平台名稱，但他轉發嘅兩條影片都同送餐平台有關，其中一個帖係以「平台係騎士嘅母親」為題暗諷；另一個帖則講述送餐平台抽佣問題，聲稱「喺某單外賣中，商家賺１０﹒５人仔，騎士賺２０﹒１人仔，中間３６人仔全被平台抽走」。　　　當大家為外送市場發展壯大暗暗叫好，覺得係經濟發展的另一出路，為部分受益商家創造業績，為社會提供就業機會。但有無諗過，正正因為外賣嘅迅速發展，實體餐飲業空間萎縮，租用嘅商店面積縮水，服務人員同樣減少。科網平台睇中外賣業務嘅潛力，正正係因為外賣平台已經取得內地餐飲業嘅主導權，業內甚至出現咗專為外賣而設嘅網絡餐飲店，其實某程度上外賣平台同電商如出一轍，都係汲取緊實體經濟嘅活力。　　　或者有人覺得騎手因為收入豐厚得益，拯救神州就業，但恐怕唔足夠反映事實，大部分騎手只以賺快錢心態投入呢個行業，好少有人想以此作為終身職業，而且平台向顧客提出嘅送餐時間承諾愈來愈嚴苛，唔少騎手為咗準時送餐而罔顧交易規則，釀成嚴重事故。此外，商家因為外賣提供嘅額外包裝成本增加，運送支出亦增加，中小企利潤普遍減少，財富減少令社會整體消費更疲弱，內捲更嚴重，長此下去，最終誰人得益？請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇