《小傳日記》阿里（０９９８８）昨日收市後公布業績，第三財季賺４８９億人仔，按年增長２﹒３９倍。期內非公認會計準則淨利潤５１０﹒６６億人仔，按年升幅雖然只得６﹒５％，但好過市場預期。期內收入２８０１億幾人仔，按年上升７﹒６％。　　　阿里股價今日最多急升一成半，收市升至１３８﹒５銀，單一股份貢獻恒指升幅３３２幾點，股價自上月低位７７銀附近開市展開升浪，至今短短個幾月，股價累升近八成，兼見三年高，應真威過威士忌！　　　阿里近期系咁升，天時地利人和全部出齊。先講天時，首先ＤｅｅｐＳｅｅｋ橫空面世，震驚全球，帶動內地ＡＩ相關股受重視，而阿里作為內地ＡＩ領軍民企之一，其ＡＩ業務早已具備規模，旗下通易千問模型更聲稱超越ＤｅｅｐＳｅｅｋ（聲稱啫），市場因而重新評估其價值及未來發展潛力。地利方面，蘋果本來要同百度（０９８８８）合作開發ＡＩ，可惜百度唔爭氣，接唔住貴客，而ＤｅｅｐＳｅｅｋ規模又太細難堪重用，結果就輪到阿里冷手執個熱煎堆。至於人和，中國國家主席習近平在京出席民營企業座談會，韜光隱晦多年嘅阿里創辦人馬雲坐正第一排，地位大逆轉，有助阿里從此一洗頹氣，重振昔日雄風，分分鐘連螞蟻都可以重新上市。　　　還記得２０２０年底，螞蟻集團原計劃於１１月５日喺香港上市，當時招股轟動全球金融市場，用「舉世矚目」一啲都唔誇張。招股期間，無論係金融機構定小散戶都情緒高漲，積極認購。當時各大券商，金融機構孖展多多都唔夠用。據報，當年超額認購大約３８８倍，以倍數來計可能唔覺得出奇，但螞蟻當年認購人數多達１５５萬人，呢個記錄至今後無來者，大破工行（０１３９８）之前保持嘅１４年記錄。再以金額計算，螞蟻當年凍資高達１﹒３萬億銀，同樣刷新香港新股招股紀錄，相當於每名投資者平均斥約８５萬元認購螞蟻。　　　如果成功上市，螞蟻嘅凍資金額，至今喺港股中仍然所向無敵。按當時市場估計，螞蟻集團總市值可能達到２﹒１萬億人仔（約３１３０億美金），一度被稱可能創下「史上最大ＩＰＯ」新紀錄。由於當年螞蟻仲係阿里旗下，所以喺螞蟻招股果幾日，阿里股價被推上巔峰高達３０９﹒４銀（除淨後３０６﹒８銀），當時市值超過六萬億銀，凌駕於股王騰訊（００７００）。　　　當年借到孖展嘅客戶都滿心歡喜，一心諗住，只要中籤幾乎穩賺，只系賺多賺少嘅問題。點知人算不如天算，螞蟻臨門一腳突然被叫停。至於被叫停嘅原因眾說紛紜，呢度就唔講咁多啦，但阿里巴巴股價自此就江河日下。　　　時至今日，雖然阿里和螞蟻嘅關係已經由旗下變成關聯公司，但王者畢竟係王者。即使無咗螞蟻，阿里一樣周身刀張張利一樣掂。近期阿里食正ＡＩ條水，股價係咁升，可以話重見天日。雖然比起高峰期股價３００幾銀仲有一大截，不過如果真如外資所講，神州科企小強挑戰美股七雄地位的話，股價「番家鄉」真係一眨眼嘅事，不過呢哋恭維說話聽聽就算。　　　順帶一提，今日蜜雪冰城（０２０９７）開始招股，同事都議論紛紛，因為聽聞有單一券商短短三粒鐘已經錄得超額認購１７倍幾，如果計埋其他券商，過多幾日埋單計數，隨時超購過百倍都不足為奇，真係可喜可賀！但筆者唔知係唔係因為見過螞蟻招股嘅盛況，所以對超購過百倍已經無乜感覺。唔知幾時先可以又出返隻好似當年螞蟻咁，過百萬人認購，過萬億銀凍資額呢？請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇