《小傳日記》等咗五年，特斯拉嘅ＦＳＤ（完全自動駕駛）終於喺神州有咗新進展！不過，神州嘅自動駕駛市場早已經變曬天，華為、比亞迪（０１２１１）、小鵬（０９８６８）呢幾個本地玩家，已經將自動駕駛玩到火熱，仲建立咗強大嘅護城河！相比之下，特斯拉如果想靠ＦＳＤ重奪市場話事權，睇嚟未必咁容易。　　　神州本地品牌嘅智駕系統都停留喺Ｌ２階段，即係部分自動化，不過司機仍需主導駕駛，而特斯拉ＦＳＤ介於Ｌ２級到Ｌ３級，司機要承擔駕駛責任，要有隨時接手駕駛嘅準備。　　　為咗迎接ＦＳＤ嘅競爭，神州一眾車企各出奇謀：華為靠激光雷達、多傳感器外加本地數據優勢，建立自家獨門智駕技術。余承東仲多次放話：「就算唔用激光雷達，智駕功能都碾壓特斯拉」；小鵬ＣＥＯ何小鵬就豪言，今年年中會推出超越特斯拉ＦＳＤ嘅準Ｌ３自動駕駛系統；至於比亞迪靠低價路線殺出血路，打出「智駕平權」旗號，甚至將最低階版本嘅「天神之眼」部署到廉價車型，你有你勁我有我平！　　　　一邊係馬斯克今年１月啱啱話即將搞掂「神州嘅巴士車道問題」，另一邊係本地玩家追住打，特斯拉想喺神州翻盤，可以講係分秒必爭。講起「巴士車道問題」，大家唔好以為巴士有晒班次表就好容易處理，事實上神州嘅巴士行車規則複雜到飛起，早晚高峰限行、節假日臨時變更，仲要唔同城市唔同玩法，所以最簡單直接嘅方法，當然就係靠關係，接入唔同城市嘅車聯網系統啦。　　　例如，小鵬已經聯入廣州嘅「Ｖ２Ｘ　車聯網系統」，做到路端信號同車端決策毫秒同步；而比亞迪喺老巢深圳攞到特殊許可，實時獲取公交車道數據，甚至喺政策公開之前４８小時就攞到資料，提前訓練模型。至於特斯拉作為外來物種，就只可以靠路邊電子屏幕識別公交車道嘅動態變更喇。　　　特斯拉除咗數據唔夠，算法上都有掣肘。神州嘅數據安全法規定，所有智能車輛產生嘅數據都要留喺境內，唔可以傳去外國。結果，特斯拉喺神州每日產生嘅５０ＴＢ駕駛數據，冇辦法傳回花旗國訓練ＡＩ，但花旗國又唔畀喺神州部署高性能ＧＰＵ嚟訓練。結果就係，數據去唔到花旗國，算力又入唔到神州，特斯拉只能靠仿真器嚟訓練。但模擬始終係模擬，無論幾逼真都覆蓋唔到神州路面嘅「真實情況」，例如鬼探頭、電單車亂竄、汽車頻繁變動加塞呢啲日常操作，導致ＦＳＤ喺神州市場嘅技術表現始終差咗一截。　　　最致命嘅係，ＦＳＤ而家已經唔再係技術問題，而係政治籌碼！《金融時報》爆料話，神州監管部門已經將ＦＳＤ許可當成對抗花旗國關稅戰嘅「戰略資產」，隨時可以拎嚟同花旗國討價還價。特斯拉分分鐘變成大國博弈嘅下一個「ＴｉｋＴｏｋ」。宜家留畀馬斯克嘅時間唔多喇，睇吓佢作為侵侵嘅開國要臣，可以點樣喺呢場博弈中搵條生路，大家拭目以待啦！請請！　＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。

【香港好去處】2025去邊最好玩？etnet為你提供全港最齊盛事活動，所有資訊盡在掌握！► 即睇