《魚缸博客》美國日日都話加稅加稅加稅，好似打無雙咁，唔止針對中國，加拿大又搞，巴西又搞，總之天下最亂，美國最安樂。　　　不過市場又唔同睇法，總之美國越禁，中國晶片業就越自強。其實而家２０２５年，大家都做晒全球化分工，中國係世界工廠，荷蘭係光刻機出口，日本做光刻膠；你唔俾人出口，即係斷人米路，起初一兩年都會做下樣，但之後人地都要食飯、要搵錢，仲同你傻？　　　不過，就算呢一刻美國話唔收稅，打和啦Ｓｕｐｅｒ！咁係咪又代表可以回到過去呢？博客覺得非也，因為警鐘一敲響，進程就唔會停止。而家迫到中國對晶片自研嘅警鐘響起，從光刻機到晶片工廠都會自主研發，未必跟得上外國水平，但起碼唔會再依賴外國入口。　　　係呢個情況下，中國晶片公司就好似獨家生意咁，中芯（００９８１）炒完，今日明顯見到華虹（０１３４７）有大資金流入，其實都係輪流炒，總之美國越打壓，股價升得越犀利。　　　你會問中國唔係咩都靠抄咩？抄人又可以成功？調轉講，所有科技發展，都係國家與國家之間抄下抄下，然後為左超越就出現創新。正所謂三十年河東，三十年河西，中國科技發展成點，三十年後你又敢唔敢擔保？　《編者按》本欄搜羅即市傳聞，惟消息未經證實，《經濟通》亦不保證內容之準確性。

送禮活動浪接浪！想緊貼著數活動消息？即Like etnet Facebook專頁！► 立即讚好