《魚缸博客》阿爺科水灌內銀，唔通係未雨綢繆？

　　《魚缸博客》業績期終於去到尾聲，內銀今年壓軸公布業績，幾隻內銀大致上淨息差都係收
窄，始於減息點都有影響，而末期息方面都派少咗，但因為今年開始派中期息，加返回中期息計
其實全年派息係持平至多啲啲，淨息差收窄但派息多啲啲即係派息比率其實係多咗。
　
　　所以今朝內銀股就炒起？其實都唔單止係咁，面對淨息差收窄，阿爺都有出手去老撐呢支定
海神針。今日建行（００９３９）、中行（０３９８８）、交行（０１３９８）同郵儲行
（０１６５８）同時宣布直接向財政部同埋幾間國企配新Ａ股，間間都集資過千億人仔，財政部
合其為四間內銀注資５２００億人仔。同時財政部發特別國債５０００億，間接其實施就係以阿
爺名義集資科水畀內銀，所以點解內銀會係定海神針呢。
　
　　嚟到第一季尾聲，唔講唔記得，其實特朗普遍回朝都未夠三個月，但中間搞過嘅好嘢衰嘢都
比拜登一年嘅做嘢份量要多。嚟緊星期三晚就會落實對等關稅，雖然特朗普話會議有「彈性」，
但「有幾彈」同「彈邊個」都係未知，簡單講關稅方面都係不明朗，就算後日「彈」得中中國，
難保彈嗰個唔係特朗普隻「彈弓手」。所以後市唔明朗就係必然，呢個時候科水畀內銀，究竟係
彌補息差收窄，定係為之後嘅風高浪急做好準備呢？但唔理邊樣，反正有咩事就泊入內銀啦，信
者得救！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。