綠在屯門｜無塑護海藍色慶典

活動簡介

七月正值盛夏，陽光、海浪與微風，係規劃海灘活動嘅絕佳時機。然而，當踏沙而行時，本來美好嘅心情隨時會被眼前一堆堆嘅塑膠垃圾所破壞。有科學家估計，每年有超過800萬噸塑膠垃圾流入海洋， 塑膠難以被自然降解，分解一個膠袋甚至需要長達數百年時間，而且過程中會分解成微塑膠，不但危害海洋生物，更會透過食物鏈重返人體，影響我哋健康。

為響應七月「國際無塑膠袋日」﹐我哋綠在屯門為大家準備咗一連兩日嘅嘉年華 #無塑護海藍色慶典加深大家對海洋嘅認識，了解塑膠污染嘅嚴重性，鼓勵大家從日常生活中嘅小習慣開始，為大海減壓，為未來減廢，出門前拎齊走塑三寶 ，包括購物袋，水樽以及餐具，實踐源頭減廢。

嘉年華活動十分豐富， 除了 #免費二手市集及 #尋牛記，當然亦唔少得一直深受歡迎嘅 #環保工作坊，由導師教授大家善用身邊物品 #升級改造！現場更設有攤位遊戲，考驗你對海洋保育嘅認識，有豐富獎品等緊你拎走！另外，千祈唔好錯過 無塑海洋藝術展覽，讓大家了解更多海洋塑膠遺害嘅情況，喚起大眾守護海洋嘅決心與行動力！

「守護藍海，從無塑承諾開始！」

「上一堂．儲一分」積分計劃詳情：https://shorturl.at/hCd2N 

小編喺度提提你，而家參加嘉年華仲可以儲分換禮物㗎！只要於一場嘉年華中參與最少兩項活動；或於一場二手物收集活動中提交不少於2公斤二手物，並即場與當值職員完成登記，即可獲得1分「額外賞」積分每階段累積滿2分「額外賞」積分，即可換領禮品。

*每階段需要儲滿至少3分「基本獎勵」積分後，先可以解鎖「額外賞」獎勵 。

玩完仲可以儲分換禮物添，到時見喇！

注意事項：

1. 如有發燒或身體不適，請避免前往「綠在屯門」。

2. 活動期間需按職員指示排隊輪候。

3. 8歲或以下兒童須由家長陪同參與工作坊，並共同完成同一份製成品。

4. 環保工作坊材料由「綠在屯門」提供，活動採用即場報名方式（先到先得，額滿即止）；每名參加者須親身在指定位置排隊等候，並依照排隊次序進行報名。

5. 每節工作坊會於活動前20分鐘開放排隊輪候及報名。

6. 免費二手物市集只會派發，不會進行收集活動。