七月鬼節︱先人報夢趣談，陰陽界「超級聯繫人」善收風，生者死者兩皆安樂

　　鬼月講鬼故，今期談些有人氣、有溫度的變奏。

　　時下有個很流行的名詞，叫 super connector「超級聯繫人」，我有位朋友就為陰陽兩界提供有效連結，過程一點都不詭異，其實幾搞笑！

　　她爸爸生前說過，死後要海葬，有位從事殯儀業的親戚屢次勸阻無效。他過身後，我朋友就執行指示，租船出海，誰料遇到黑雨，撒不成。如是者這天氣不似預期上演了三次。

　　第四次出海時，朋友就同父親「講數」：「老竇，如果你再玩，我就一定送你去骨灰龕，你唔使旨意碧波暢泳咧。」

　　一家人正打算上船之際，密雲急聚，海天一色（咁灰），跟住傾盆大雨。

　　朋友說得出做得到，很快就物色到骨灰龕，上位那天，天空竟然出現彩虹！

　　不久，父親報夢給她，說「安樂哂！不過我喺下邊，物資有啲缺乏。」

　　朋友在殯儀業親戚的協助下，燒了「一噸」禮物給他。她在祖屋村屋門前燒這些紙紮禮品時，因為陣容鼎盛，鄰居們都紛紛過來圍觀，紛紛以「大陣仗」來形容，盛讚這些禮品設計創新，富想像力。

　　那晚，父親又在夢中和她溝通：

　　「多謝你燒咗架名牌環保汽車俾我，仲有遊艇。而家我可以遊船河，唔使水上漂咧！」

　　「老竇，我諗得到嘅嘢都燒咗俾㗎咧，包括iPhone，酒櫃，豪宅等等。我仲豪咗架飛機俾你，不過冇整大炮，因為你自己都識車！」朋友說。

　　老竇騎騎笑話：「而家我喺下邊，真係安居樂住。」

　　靈界眾生，收到與收不到禮物都有反應。

　　朋友的阿爺仙遊後，因每年負責春秋二祭的姑姐「供貨不足」，逝者「報串」！阿爺報夢給朋友說：「我啲底衫褲用晒咧。」朋友翌日問姑姐，回應是：「嘻嘻！我今個清明唔記得燒衣包俾佢，你點知㗎？」

　　除了夢見過身的至親之外，朋友也常常在親戚圈「收到風」。

　　有位親戚，因家中有男丁反對辦喪事（怕分薄了家產），因此靈堂一切從簡，朋友去完鞠躬，當晚就夢見親戚投訴：「我唔夠被冚。」，原來喪禮不設壽帳，累得死者捱冷。

　　另一親戚，死後有「對焦」問題，我朋友怎知道呢？又是夢中「收料」。這親戚說：「我副眼鏡唔係幾啱呀。」朋友便問親戚太太，才獲告知，原來親戚因癌症病逝，癌症會引起眼睛的度數時有變化，太太在陪葬物件中只放了最近的眼鏡，卻原來人走了，度數可能回復至未病時！

　　這些事情真是匪夷所思。但想深一層，撇開神鬼迷信的爭議，如果至親走了，仍能夢中相見，也不一定是件壞事。

　　有一個時期，連她爸爸在內，有四位親人相繼離世。她夢見這四人在一顆大榕樹下，她一時悲傷，就抱怨：「點解你哋一齊離開我？」爸爸答：「人遲早都要報到，我哋四個而家一台麻雀，都唔知幾掂檔！」

　　無論是死了的人相聚，或生與死的人夢裏相逢，總算是 happy reunion，留一絲溫暖在心中，生者與死者兩皆無憾……