魚缸博客 | AI殺到埋身，演員飯碗危矣！商湯SEKO同Seedance 2.5有幾勁？

　　博客有個做影視製作嘅老友，佢近排一臉愁容同我講，而家橫店靜過鬼，以前劇組多到逼爆，家下新開劇組腰斬咗七成。唔講唔知，原來2026年第一季全行業上線微短劇約12.8萬部，AI微短劇佔咗超過95%。即係話，十套短劇入面得半套係真人拍嘅。

 

 

　　呢個數字背後，係成千上萬演員嘅血淚。有短劇演員由月入兩三萬人仔，搞到要返鄉下耕田。腰部藝人片酬直接腰斬，由單集數千元跌到一兩千蚊；底部藝人直頭無戲可拍。橫店群演接單量同比下滑37%，中腰部配角片酬普遍跌40%，短劇專職演員嘅就業率得返29%。有演員感嘆：「點解第一個被AI取締嘅係我哋行業？」

 

　　有人話AI做唔到真人嘅情感，但現實係，觀眾已經用播放量投票。2026年4月，一部AI仿真人短劇《菩提臨世真人AI版》登頂紅果短劇熱度榜第一，有網民留言「人類一敗塗地」。連燈光、服化道、攝影、副導演全部下崗，成個片場壓縮到一部電腦搞掂。

　　博客留意到AI影片生成嘅威力，最近自己都有開商湯嘅Seko玩下。呢個平台2025年7月上線，一年唔夠用戶突破100萬，增長26倍。Seko 3.0仲犀利，以Agent、無限畫布同Skill生態建立影視級生產能力，打造咗業界首個「AI視訊夢工廠」。

 

　　最恐怖係乜？Seko可以連續生成100集內容，每集長達3分鐘。佢個「無限畫布」功能，用戶輸入劇本，Agent自動生成角色、場景、分鏡，從0到1完成晒。仲有Skill生態，將爆款團隊嘅題材判斷、敘事節奏、角色設計封裝成可以直接調用嘅模板；即係話，連經驗都唔使累積，直接跟高手學。另一邊廂，字節跳動今年7月推出Seedance 2.5，威力同樣震撼。單次生成視頻時長由15秒提升到30秒，仲支持多輪延長。30秒內可以組織多個有關聯嘅鏡頭，做到劇情鋪墊、推進、轉折同收尾，唔再係以前嗰種「會動嘅PPT」。

 

　　有演員仲堅持話「AI代替唔到真人」。但現實係，製作方睇成本，AI短劇成本得真人劇嘅十分之一，製作時間由15至30日縮到1至5日。當一套劇嘅成本由幾十萬變成幾千蚊，你係老闆你會點揀？香港都有男藝人將肖像權授權出去，對方用佢20歲嘅樣貌打造AI電影，自己完全唔使拍。呢個趨勢，恐怕好快會殺到嚟香港。

 

　　有人話AI創造咗新工種，例如「抽卡師」專門喺大量生成素材入面揀靚嘢。但相比消失嘅燈光、攝影、服化道、副導演、外聯、生活製片，呢啲新職位杯水車薪。短劇產業約200萬個就業崗位受衝擊，呢個唔係小數目。

 

　　商湯Seko同Seedance 2.5只係冰山一角。當AI可以一個人拍晒成套劇，傳統影視工業嘅生產模式，恐怕會徹底改寫。演員朋友們，與其等運到，不如諗下點樣轉型，或者有朝一日，你都要學用Seko，自己做埋導演。