《小傳日記》布魯可IP之外兼具硬實力？出海唔一定靠複製泡瑪！

　　《小傳日記》乘著穀子經濟熱炒，布魯可(00325)呢個時候上市都唔知係「時勢造英雄」定「英雄造時勢」，雖然尾市回落唔少，但最高就見過109.9銀，最多每手賺14865銀，唔係最高位沽都賺一皮有多，係近期上市當日最佳表現新股。

　　時間上好有趣，明明泡泡瑪特(09992)都已經炒咗成年，但到上年底先有「穀子經濟」呢個名響起，之後個幾月就有布魯可乘熱潮上市，你話係布魯可自製「穀子經濟」炒風我都信！孖屐正正就係睇好布魯可挾著龐大IP量可以有望對標泡泡瑪特，鹹蛋超人同變形金剛係兩大最重要IP，其餘火影、Marvel、Pokemon、蒙面超人、柯南同初音等等都有授權布魯可。

　　但其實除咗IP之類嘅「軟實力」，布魯可嘅硬實力都好充足。布魯可叫得做中國版Lego，主要係由於模型關節零件有專利設計，可以標準化生產玩具，令玩家砌落唔會kick住kick住，仲可以自行mix & match。大家未必知道，Lego係世界上最賺錢嘅玩具公司，擁有極廣嘅粉絲群同大量IP優勢，業務護城河深不見底，屹立咁多年地位都係不動如山，對標Lego可能係布魯可最具潛力嘅位置，當然啦，以現階段表現嚟睇，布魯可要挑戰玩具界大神真係未有咁早。

　　賣鹹蛋超人公仔固然夠賺錢，但原來拼搭角色類玩具先係布魯可嘅增長引擎，由2022年推出以來就一直暴風成長，喺2022年同2023年帶來嘅收入分別係1.18億人仔同7.69億人仔，到上年上半年已經係10.23億人仔，即係上年半年已經超過2023全年收入，所以今日炒起除咗有概念加持之外，業績急速成長都price in唔少。

　　至於另一個對標對象，唔少人都可能覺得係泡泡瑪特，不過筆者覺得兩者業務差別都幾大，唔可以一概而論：其一泡泡瑪特出海策略大獲成功，喺海外市場增長驚人；其二泡泡瑪特IP都係自有，唔需要被授權方勒住條頸；其三泡泡瑪特靠高網絡流量實現變現力。布魯可針對市場主要係國內嘅小朋友同「大細路」男士為主，到目前主要係食IP同硬技術，針對泡泡瑪特嘅三個食糊位都未有明顯涉獵。

　　不過有難度又唔代表做唔到，未做即係仲有做嘅空間。目前布魯可仲未開拓海外市場，但IP要睇地方喜好，不過砌梗型係地球共同語言，言語不通嘅小朋友都可以坐埋一檯玩Lego，話唔定布魯可參考Lego發展模式，以IP聯乘策略培養海外小粉絲，等佢哋大個再變成忠粉，之後一家大細一齊拼積木，可能就係布魯可未來嘅發展藍圖，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。