《小傳日記》高價炒利是封？不如將錢留住今晚同屋企人食餐好！

　　農曆新年嚟到，大家都準備咗幾多錢出嚟派利是呀？派利是講嘅係心意，派多派少都唔緊要，有心意就得，最緊要大家開心。但亦都有人花心思喺「利是封」嘅設計同身份象徵上面。
　　
　　今年炒到最熱嘅係滙豐銀行160周年嘅私人銀行利是封禮盒，內有30個利是封，設計勁精美，但二手平台炒價竟然高達3888蚊！唔只滙豐，仲有瑞銀嗰套紅腹錦雞設計嘅利是封，叫價999蚊，至於蘋果公司嗰款金色蛇形圖案嘅利是封，竟然炒到3000蚊一套，平均一封500蚊！

　　大家用靚利是封嚟炫耀身份地位，甚至呃like都無可厚非。但係如果係為咗炒黃牛，咁就算罷啦，風險實在太高，等過埋正月十五冇人再派利是，呢啲利是封就再冇流通價值。大家都應該有過同樣嘅經歷，就係過完年執屋發現一堆設計精美嘅利是封，都唔知點處置好，尤其係一啲印住當年生肖動物嘅利是封，如果想循環再用就要等12年！

　　咁如果將呢啲利是封擺多十幾二十年，係咪就有投資價值？古代書法家連一時肚痛寫低嘅書札都可以流芳百世，有美學價值嘅利是封自然都可以珍藏。不過問題係利是封嘅印刷工藝上缺乏獨特性，偽造嘅難度極低，而且缺乏成熟嘅市場同定價機制，同郵票、紀念鈔呢啲歷經考驗嘅收藏品唔可以相提並論，你話佢值3888蚊，但係對於樓下清潔嬸嬸嚟講，利是封嘅價值可能仲不如入面嘅廿蚊紙鈔！

　　講到尾，利是封係用嚟包利是提供社交價值嘅，與其幾千蚊買幾張利是封得個擺字，倒不如將啲錢用嚟孝敬屋企人，買啲實在嘢俾長輩開心下吖！親情嘅價值，唔係靠利是封嘅價錢嚟衡量嘅嘛。

　　最後，祝大家新年快樂，身體健康，團團圓圓！今晚記得同屋企人食餐好嘅，陪下家人，呢啲先係真正嘅幸福，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。