《魚缸博客》日經同台灣加權指數都跌近千點，蛇年開門紅有難度

　　今日(3日)係蛇年第一個交易日，博客祝大家今年要穩穩陣陣地賺，穩穩陣陣地贏！不過今年日經同台灣加權平均指數都跌成千點，睇怕A股蛇年開門紅有小小難度。

　　相反今日港股水靜鵝飛咁款，都係跌百點左右，其實係因為內地仲係新春假期，大家都未埋位工作，預計內地開市之後就會連同港股一齊向下沽爆佢。

　　博客之前都呼籲過，大家有貨係手的話，有糊就食咗佢，無貨係手輸小小打個和，一係就跟手開個PUT輪或者熊證玩玩佢，特朗普上台第一個動作就係對華加徵關稅，呢件事對股市來講肯定係一個負面打擊。
　　
　　咁係咪無嘢值得買呢？又唔係嘅，AI概念、晶片概念、比特幣概念都值得關注，不過都係買少少就好，唔少人都開始覺得有少少泡沫出現，個感覺有點似當年「。com」熱潮咁。

　　博客今日就唔推介買乜貨啦，因為今日仲有個唔開心消息，就係台灣藝人大S因為併發症離世，享年48歲，咁後生就走，唉。

《編者按》本欄搜羅即市傳聞，惟消息未經證實，《經濟通》亦不保證內容之準確性。