《小傳日記》長和賣港口關唔關侵侵事？袋成千億港銀會豪派特息？

　　《小傳日記》侵侵最近喺內地多咗兩個花名，叫做「特沒譜」同「特不靠譜」，認真貼切，
一啲都無花假，事關佢再次入主白宮後，國內日日家嘈屋閉，孖屐震個不停，鑊鑊新鮮鑊鑊金，
一陣又話接管加沙地帶；一陣叫囂要將北約盟友丹麥嘅格陵蘭納入版圖；一陣又口出狂言叫加拿
大成為美國一個州，究竟有邊樣嘢係靠譜？
　
　　侵侵啲衰嘢十日十夜可能都講唔曬，今日筆者要講呢單嘢，一樣都關侵侵事。長和
（００００１）今日宣布同貝萊德－ＴｉＬ財團達成原則性協議，出售和記港口８０％股權，代
價約１４２億美金（折合約１１０８億港銀），今次賣出嘅資產包括令侵侵坐立不安嘅巴拿馬港
口公司股權。早排侵侵就指巴拿馬運河控制權落入神州手中，並聲稱要重奪運河，仲即時派國務
卿魯比奧去巴拿馬走一趟。魯比奧前腳離開，巴拿馬就宣布退出「一帶一路」。
　
　　今次長和賣港口資產，雖然集團強調純屬商業決定，但話唔關花旗國壓力都勢係假。事關港
口基建係長遠投資發展項目，無乜特別原因都唔會輕易出售。雖然近期花旗國大打關稅戰，尤其
針對三大進口國，但加拿大和墨西哥都喺花旗國南北面，主要用陸路運輸，而且兩國都同花旗國
一樣，東岸係大西洋，西岸係太平洋，繞道巴拿馬運河運到美西嘅貨量相對少，無論有無貿易戰
，對於長和巴拿馬港口業務影響有限。
　
　　至於對神州加徵關稅，其實早喺侵侵第一任期間就已經加過，又唔見當時港口業務受到好大
打擊。何況，有啲嘢例如衫褲鞋襪，就算唔同神州買，一樣要同其他國家買，入口時一樣要經過
港口處理。除非侵侵的起心肝，一於唔同外國做生意，以後叫佢老婆日日坐喺海湖莊園織冷衫，
又或者叫返班非法移民返轉頭，幫佢車內衣褲。就算侵侵癲起上來實行鎖國封關，但花旗國東岸
啲貨要經水路運去西岸，一樣要經巴拿馬運河。所以，只要花旗國內、外貿一日存在，港口生意
就繼續有得做。何況，四年之後侵侵落台（萬一做唔足四年落台就當別論），到時換第二個人上
台，可能又會推翻侵侵嘅政策，唔通到時先來重新買返港口資產？坐擁巴拿馬運河港口相當於養
咗隻生金蛋嘅母雞，長和今次賣港口資產，口口聲聲話不涉及政治壓力，但都好難令人信服。
　
　　不過小股東當然唔會關注長和嘅未來福祉，只會關心有無著數益街坊。今次長和一炮過袋成
千億銀落袋，荷包腫脹。有大行估計長和或會派特別股息，而且每股豪派２５港銀咁多，即係每
手可以派番１２５００銀！係真唔係？筆者唔敢講。不過最近聽聞股神巴菲特旗下巴郡手頭現金
達到創記錄嘅３３４２億美金。筆者反而覺得會唔會超人同股神一樣先知先覺？覺得時勢唔對路
，留返多啲現金等到環球經濟大逆轉，到時執平嘢？如果係咁，長和到時派嘅特息可能打番個折
頭，大家拭目以待！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。