《小傳日記》巴巴追揸沽！何議員最後沽唔沽得出呢？

　　《小傳日記》噚日波叔整嘅大餅終於出爐，巧婦難為無米炊，糖落得唔多，刀痕就周圍都係
，但偏偏公務員只係凍薪而唔減薪，有份避過一刀嘅何議員反而直接引經據典直指高官唔帶頭減
薪係「肥到鞋都著唔落」，自己本人就莫講話凍薪，連減薪都唔怕咁話。你咁講我都敢信，議員
高薪厚職，「何議員」有閒錢到可以炒吓股，一定唔怕減薪啦，不過此「何」就不同彼「何」。
　
　　《財政預算案》讀足兩個鐘，不設質詢環節，所以全體立法會議員基本上都係齋坐喺度聽。
唔少行家都留意到，今次《預算案》個個議員都精神唔錯，無人瞌眼訓，但何俊賢議員就被捉到
喺波叔宣讀期間頭耷耷有嘢忙緊。行家發現佢原來喺部Ｐａｄ度碌吓Ｆａｃｅｂｏｏｋ之餘，仲
有時間瞄緊自己個倉！
　
　　高清鏡頭下真係唔好隨便打開私人電子產品，何議員唔單止畀人發現醉心炒股，仲要睇到何
議員炒緊嘅係巴巴（０９９８８），一路都係停留喺要唔要沽嘅版面上面，大家都好關心何議員
嘅炒股進展，而佢最後都無喺宣讀《預算案》期間沽出，可能係畀波叔整嘅大餅感動掛。事後各
大行以花邊新聞大做，「何俊賢沽阿里巴巴」更加登上熱搜。
　
　　流量果然永遠喺最意想不到嘅時候產生，「英雄造時勢，時勢造英雄」，流量一到當然係捉
得愈快愈好，噚日下晝富途牛牛就已經即刻喺Ｔｈｒｅａｄｓ出文，公告天下話何俊賢正正就係
用緊富途期權版面嚟炒巴巴。有人問富途會唔會請何議員上去傾吓持倉，富途小編都講笑話可能
大家都有興趣知議員持倉系列。
　
　　何俊賢做緊嘅係一隻巴巴美股認購期權，星期二晚巴巴美股就係升少少，唔知何議員係咪都
傾向短炒想止賺呢？但如果佢當時無放到，揸多晚就可以再贏多啲。不過波叔呢頭喺《預算案》
想方設法要提升港股成交兼活化市場，但何議員就係經美股嚟炒巴巴，唔知經過波叔一番刺激措
施，何議員有無興趣將巴巴轉返嚟港股倉位，親身支持返港股嘅現金流呢？請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。