《魚缸博客》小小超同總理開心大合照，代表超人家族甩難？

　　《魚缸博客》長和賣巴拿馬港口單嘢，之前又傳到領導人震怒，香江兩代特首都公開向誠哥
家族插箭，但事件本質始終係一家香江集團出售境外港口業務，除咗打感情牌，北京都無咩招數
應對。長和受壓咗一排，但今日股價又反彈喎，唔知係咪因為小小超上京同李強開心大合照，即
時又令大家覺得誠哥又一次贏咗？
　
　　噚日北京搞咗個「中國發展高層論壇」，由國務院發展研究中心主辦，總理李強親自出席，
請咗唔少優秀民營企業家出席，例如小鵬（０９８６８）創始人何小鵬、宇樹科技創始人王興興
，外資代表有蘋果庫克、三星李在鎔、高通阿蒙等等，睇呢個陣容就知國家要呵護民企穩住外資
啦。身為李家人嘅李澤楷現身論壇，完場仲有份同李強同框大合照，孖屐對於長和系嘅擔心稍為
降低咗啲。
　
　　但和頭酒係咪咁易擺呢？眾所周知總理更傾向負責經濟、民生之類嘅貼地工作，而長和賣港
口呢壇嘢，一旦被捲入政治風暴，就唔係參加幾場酒會就可以解決嘅事，古往今來「鴻門宴」嘅
例子大家聽得唔少。
　
　　目前真正係長和系嘅公司包括長和、長建（０１０３８）、長實（０１１１３）之類先係由
李澤鉅做主席，係長和賣港口嘅關事人物。而李澤楷目前喺長和系嘅參與度係極低，主力業務都
係電盈（００００８）、香港電訊（０６８２３）、ＦＷＤ富衛之類，全部都係以個人名義而唔
係長和系，基本上除咗係姓李之外，可以話同長和系根本無關，如果話小小超爭取下畀
Ｍｉｒｒｏｒ打入國內市場，可能仲現實啲。
　
　　又再一點，電盈大股東除咗李澤楷之外，仲有持股１８％嘅中聯通，所以電盈系基本上係同
阿爺比較友好，加上通訊行業一直係阿爺嘅重點發展，小小超身為本地電訊一哥，搵佢傾大計都
係理所當然，成件事真係實牙實齒嘅「純粹商業活動」。話雖如此，今次事件足證超人家族嘅能
量不止於「地產霸權」，作為香江特殊經濟地位嘅金漆招牌，香江首富嘅政治價值比馬雲、許家
印等前神州首富不能同日而語，再加上誠哥長袖善舞嘅交際手腕，之前大大小小嘅政治風波都過
得去，今次嘅紛擾都一定有方法化解！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。