《魚缸博客》港股研究可以每股買賣，究竟係好定壞？

　　《魚缸博客》今日市場最新消息，就係有傳港交所（００３８８）終於開始做嘢，研究將股
票買賣數量，由「每手」改至「每股」，特別係最貴股份，以期刺激交易。
　
　　其實呢件事已經嘈左好耐，點解美股可以一股一股買，港股仲要ＳＥＴ入場費咁，一手一手
買呢？不過博客認為，呢件事真係有辣有唔辣，一股一股去買當然刺激交易，但都會衍生好多問
題係可能香港呢邊未必適應到。
　
　　暫時傳出聲音，係大價股先可以一股一股買賣，但呢件事唔俾細價股做，或者會嘈到拆天。
早幾年就美國ＧＭＥ事件，以散戶戰勝大鱷，就係因為散戶一人一股買小小「抱團」，先可以夾
爆大莊，即係港交所唔俾散戶參與細價股一股買賣？即時興趣大減，我買得騰訊１０股先
５０００蚊，佢升一蚊我先賺１０蚊，有咩意義呢？但細價股由１蚊炒到１０蚊，我同樣買１０
股，我入場成本低之餘回報率有９００％，咁樣先可以吸引到投資者入場架！
　
　　其次就係碎股問題，假如持有一股，公司進行供股之後，個啲１╱３股、１╱４股、１╱５
股，或者要去到小數點之後嘅股，要點買賣？學返而家咁低放低幾格價錢去賣？定係唔俾買賣？
博客就覺得好複雜。
　
　　同埋呢個政策，唔係恒指２８０００個陣去做，係而家升得個２３０００先去考慮，而家美
股道指又面臨雙頂，分分鐘隨時一個浪殺埋來，又殺埋香港，到時一股都無人買，咁就真係肉酸
啦。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。