《魚缸博客》關稅問題香港進出口受阻，運輸類股份鳴金收兵

　　《魚缸博客》話說侵侵一上台之後，我都叫大家唔好咁老定，今次就對住香港嚟打，美國對
神州進口商品加徵１０％關稅的措施開始生效，而呢次聽聞，有傳香港製造、進口及轉口的產品
，都要額外徵收一成關稅。
　
　　目前香港呢方面都尚未回應，但必然令到香港呢個航運樞紐再衰多兩錢重，本來神州被人收
稅，香港都可以「借啲夷」偷下雞，呢次連香港呢個轉口港都堵塞埋，一律收１０％關稅，無情
講。
　
　　另外，美國郵政都暫停接收神州包裹，其實都係想打擊中國電商。不過博客都有係亞馬遜買
過嘢，其實當地人一早唔用美國郵政，順豐（０６９３６）已經喺美國插晒旗，當地人都識用，
反而我覺得唔太大影響。
　
　　不過可以肯定一點，運輸類股份或多或少都會受到影響，不過今日東方海外（００３１６）
不跌反升，就真係有小小耐人尋味。不過都係建議鳴金收兵，避一避風頭。
　
　　又或者神州商人用第二種方法，將商品ＳＨＩＰ去南美洲再入盒，定義來講都唔算係「中國
製造」，其實已經有人做緊，所以侵侵先想加埋加拿大同墨西哥關稅；不過人地都識發惡，侵侵
就話我延遲收啦。唓，誰大誰惡誰正確。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。