《魚缸博客》避險因素金價續炒高，金貓銀貓不停炒起！

　　國際地緣政治因素不停升溫，呢期金價銀價都好似升勢無停過咁，如果近期最受關注嘅相關股份，必定要提到金貓銀貓(01815)。

　　介紹下佢先，原本金貓銀貓於2018年由中國白銀集團(00815)分拆並係香港上市，最近公司宣布改名為「珠峯黃金集團有限公司」；另一方面，公司喺山南勘查區發現金礦化帶，推算礦石量約為210萬噸，推算金屬量約為5800公斤。

　　我估炒友們睇中佢最大原因，第一就係佢細隻容易炒，第二就係佢比起其他金礦股都尚算新，所以大家都中意向佢埋手，其實佢呢幾個月股價已經好炒高六倍幾，但博客認為都未到佢嘅極限，畢竟而家個市又無咩好炒，而佢個價都係得蚊幾，唔炒佢炒邊個呢？
　　
　　睇下其他分析點講。軟庫中華發布研報稱，金貓銀貓去年調整公司策略，終止經營業務生鮮食品零售業務，重點拓展上游礦山業務；公司手持淨現金3.4億元人民幣及存貨帳面值9.7億元人民幣，存貨主要包括銀條、有色寶石、珠寶產品、金條。現時市值為16億港元，相信仍未反映公司拓展上游業務潛力。

　　佢一上市已經兩個幾，不過因為呢五六年大市氣氛太差，都係浮浮沉沉咁，而家算係有些少動靜，有興趣想短炒不妨考慮下！不過呢一隻對比起其他黃金股，防守性唔太強，有咩風吹草動記得唔好眷戀，離場最緊要。

《編者按》本欄搜羅即市傳聞，惟消息未經證實，《經濟通》亦不保證內容之準確性。