《魚缸博客》港股第二波跌浪已經差唔多開始，你又坐穩未？

　　經歷左幾日平靜，大家係咪已經有啲唔習慣？大家呢期都係坐開過山車，突然個市平靜到咁，博客覺得，應該係時候要預備第二波跌浪啦。

　　最基本睇返恒指走勢圖，恒指10天線要預備跌穿100天線，而且14日RSI係50樓下都未見有咩上望空間，最基本解釋就係恒指走勢疲弱，要預備失守20000點關口，而今日悶市的情況下，應該係大莊為下跌開始做緊準備。

　　而大市下跌，需要一條導火線，呢條線係咩博客仲估緊，但博客認為係關稅機會不大，而似係一啲黑天鵝事件，例如聯儲局唔係議息期間減息、或者美債出現危機之類嘅問題，而有部分人已經「預先」知道呢件事要預備發生。

　　正如博客之前所講，呢一波下跌可能要到18500點先會企穩，如果玩下手跌穿埋就一瀉千里，呢個時候真係唔好鬥氣，一係離場一係買跌。

　　博客睇左咁年股票，係呢個股市氣氛下可以突然咁平靜，一定有暗湧，睇下博客準唔準啊又！

《編者按》本欄搜羅即市傳聞，惟消息未經證實，《經濟通》亦不保證內容之準確性。