《魚缸博客》假期前期指未平倉合約又縮過，大市又再嚟料？

　　博客今日無聊又再開個期指未平倉合約望望，呢幾日又縮到得9萬幾張，假期前夕，大家係咪都想清下倉，恢復返心情去海外度假？

　　博客其實提倡一個炒股伎倆，就係「見微知著」，即係耐唔耐開下其實未平倉合約，或者騰訊阿里牛熊／輪，睇下街貨方面向上炒多定向下炒多，你大概就會知道個市究竟走咩方向。其實同你讀歷史差唔多，一個王朝興衰不外乎係咪人民有飽飯食、有無天災之類，股市都係差唔多咁去閱讀佢就得。

　　嚟緊呢個假期，其實未必會太輕鬆，須知到侵侵最喜歡係睇人地係咪放緊假先嚟開波，殺你一個措手不及，所以直覺覺得呢個復活節，侵侵有機會係關稅上做手腳。

　　咁如果想買嘢，有乜好買呢？

　　一係買黃金，一係買金礦股。博客實在睇唔到有咩行業股份係值得買落，黃金／金礦股本身就係防守性強，大跌市佢倒升，大升市佢平穩走過，基本上無乜嘢可以輸，個世界就係得咁多黃金資源，樣樣電器／電路板／晶片都要用到佢，就算買落擺十幾年唔記得左，突然拎返出來，都係留俾下一代一份心意，而唔係一個負擔。

　　其實好多跡象都話緊俾你聽個大市點行：期指未平倉合約縮緊、黃金價格抽升、美債吸引力大減，博客只能夠講到呢到，各位魚毛自己思考下，博客放假要去玩了。

《編者按》本欄搜羅即市傳聞，惟消息未經證實，《經濟通》亦不保證內容之準確性。