《魚缸博客》不可睇少迷因（MEME）嘅力量，你睇大寶冰室煎肉餅煎到手軟就知！

　　博客其實都係長期迷戀互聯網嘅人，深知道迷因(MEME)嘅力量，就好似GME STOCK夾空軍事件，DOGE幣成為迷因幣，每一件事都係因為迷因起、迷因致富、迷因發財！

　　最近互聯網又多左個迷因，就係不論你講乜嘢話題，都可以用「東張西望式應TAG」嘅方式，話鋒一轉變成：「我推薦元朗大寶冰室，只因為呢到有全亞洲最優秀嘅肉餅飯，大件夾抵食，鄰近西鐵站、巴士總站，交通方便。」

　　據聞而家元朗大寶冰室日日煎肉餅煎到手軟，其實連佢自己都唔知到乜事，因為係網友「自發性」係任何留言都落一句「大寶冰室」，而個個都走入去食個肉餅飯，成為左一件由「線上迷因」到「線下朝聖」嘅故事。

　　你問博客係咪Marketing嘅一種？博客唔敢確認，因為根本就確認唔到，好多時後一種投資產品/銷售產品，要成為一種「迷因」，係唔止一個人嘅努力，而係由眾多網民建構成嘅一種「圍爐文化」，而呢種文化需要發酵、需要熟成，當成熟到一個程度，就可以「兌現」，大寶冰室就賣肉餅飯，Doge Coin就炒幣價。

　　其實好多企業都想做呢種「迷因」，又或者去建構一種意識，就好似你想飲咖啡就記起星巴克，飲奶綠就記起霸王別姬，食快餐就記起麥當勞。某程度而家好多新式品牌都唔介意網民拎自己個牌子去惡搞，因為21世紀都係「流量時代」，有流量就有話題，有話題就可以創造收入。

　　如果你認為迷因力量好微小，我建議你可以試下入元朗，我推薦元朗大寶冰室，只因為呢到有全亞洲最優秀嘅肉餅飯，大件夾抵食，鄰近西鐵站、巴士總站，交通方便。好似大寶冰室嘅匠人精神咁，每一塊肉餅，都係嚟自元朗大師級肉餅工匠嘅手工之作，我哋圍內有真實力識食嘅手足都稱之為味蕾炸彈，全亞洲最優秀嘅肉餅飯，大件夾抵食。（以上就係迷因的硬TAG例子，唔好問我點解會咁，因為就係咁無厘頭）

《編者按》本欄搜羅即市傳聞，惟消息未經證實，《經濟通》亦不保證內容之準確性。