《魚缸博客》究竟火險係咪可以Cover到宏福苑大火嘅居民呢，而家講法又唔一樣啦？

　　之前有好多媒體引述某位「專家」話，如果宏福苑按揭中單位買左火險，「原則上」係可以Cover到按揭額，可以唔使供落去，所以叫班居民唔使擔心。

　　但事情總係峰迴路轉，之後多位保險業人士，都要出來向媒體澄清呢位「專家」所講嘅並非係事實嘅全部，同埋都要解釋多次乜叫「火險」。

　　所謂「火險」全名係「樓宇結構保險」，佢主要係保障你當物業損毀後，重新修復單位或者重置成本，同你個按揭額係無關係。

　　又點樣去理解呢件事呢？假設宏福苑大火之前，某位居民用已補地價400萬買入一個宏福苑單位，九成按三十年供期；後來公證行、發展商夾夾埋埋話你，重置成本只係200萬，咁火險就只會賠你200萬，但你一樣必須照供360萬供款直到完結為止；但由於按揭額同賠償額存在差距，銀行一樣可以按道理照call你loan。

　　咁call唔call呢樣就係後話，因為牽涉道德同埋政府政治管理問題，但咁多棟單位究竟係拆卸重建，定係搵房委會收購，目前政府都未有定案，要做重建都可能三五七年，個班仲做緊按的居民，半年緩衝期過後，可能都要繼續「供空氣」。

　　所以希望政府盡快定案，等班居民唔好再心慌慌啦！

《編者按》本欄搜羅即市傳聞，惟消息未經證實，《經濟通》亦不保證內容之準確性。