《魚缸博客》戶戶送撤出香港下個就係熊貓？我睇就未必啦！

　　《魚缸博客》尋日不論Ｆａｃｅｂｏｏｋ定Ｔｈｒｅａｄｓ都一片哀嚎，大家都講緊戶戶送
撤出香港市場，並將香港香港區業務賣俾熊貓（Ｆｏｏｄｐａｎｄａ），又「永遠懷念」、又話
「戶戶送好好用」之類。
　
　　如果真係好用，就唔會撤出香港市場啦。
　
　　事實上香港市場本身就唔大，要容納三四個外賣平台真係會打崩頭，所以美團
（０３６９０）出海品牌Ｋｅｅｔａ就選擇用價格戰去搶奪市場，呢個都係美團係內地跑出嘅致
勝法寶。內地早幾年都有餓了麼、百度外賣、口碑外賣，之後打下打下，美團靠住「多功能整合
ａｐｐ」＋「優惠券」搶奪市場佔有率，有晒經驗。
　
　　有人問，戶戶送退出市場，係咪代表下一個就係到Ｆｏｏｄｐａｎｄａ？博客睇就未必。
　
　　喺商業世界，太多敵人存在當然會大競爭，但無敵人亦唔代表係好事，因為一塊餅一個人係
食唔晒，有敵人存在，一來可以鞭策自己公司，二來可以製造俾消費「有選擇」，三來大家搵到
自己生存空間。
　
　　個情況就好似百事可樂同可口可樂，ＫＦＣ同麥當勞，當市場造成「寡頭壟斷」之後，兩間
商業公司貌似繼續「打交」俾消費者睇，實際上佢地係唔會打死對方，因為大家都明白有競爭先
有進步。
　
　　呢個智慧，早喺幾千年前三國時代已經存在，只要三國互相打幾下，大家都生存落去；但蜀
國一崩潰，吳國都堅持唔到落去。呢種「敵人的存在」，喺商業世界，一樣重要。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。