《魚缸博客》理想ｉ８官方流出圖片有睇頭，市場普遍反應正面

　　《魚缸博客》理想汽車（０２０１５）一路最出名都係做油電增程車，博客係神州嘅親戚表
弟都有一部，曾經試搭過一次，表弟同我試過玩彈射，推背感好強，感覺同特斯拉差唔多；而且
車上娛樂都好足夠，前排堆Ｍｏｎ可以睇劇聽音樂，返鄉下真係一流。
　
　　呢次理想係微博到放出「ｉ８」系列官方照，據聞呢部係理想首部純電ＳＵＶ，其實理想之
前都出過電車架啦，叫「理想ＭＥＧＡ」，係網絡得一種聲音：「鬧」。
　
　　因為個車型好似外星車咁，但越鬧又好似越多人買，因為同樣都係大七ＭＰＶ，佢個價錢比
起豐田艾爾法平一半，又有中排ＭＯＮ、中控冷氣、電動按摩椅，正所謂「這個價錢還要甚麼自
行車？」
　
　　所以官方流出「ｉ８」圖片，市場寄予厚望，據了解「ｉ８」係六座ＳＵＶ，支持５Ｃ快充
。跟住大家關注嘅就係佢個價錢，目前「Ｌ８」賣緊３５萬人仔，仲有優惠同補貼；咁博客估
ｉ８有機會價格定係２８萬－３３萬之間，如果超出呢個價錢或者有少少心理壓力。
　
　　不過理想今日（２５日）股價已經反映投資者幾咁興奮，博客認為股價催化劑就係汽車定價
日，如果玩埋低價手段有機會再刺激股價上揚！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。