《小傳日記》騰訊居家服務機械人「小五」登場，家務姐姐遇對手？

　　《小傳日記》近日有同事放大假，原本以為佢去邊度遊埠嘆世界，點知原來因為佢屋企個家
務姐姐返鄉下，所以佢攞大假喺屋企湊細路，做埋姐姐果份。所以，屋企如果有老人家或者小朋
友需要照顧，點都離唔開家務姐姐。一旦姐姐唔撈或者返鄉下，為人仔女或父母嘅都幾頭痕，隨
時要粉墨登場，扮演姐姐嘅角色。不過好快大家就唔使愁啦，中美兩國企業都喺度大力研究人形
機械人，可能過多五年就有可能「融入家中」。
　
　　據內媒報道，ＱＱ（００７００）旗下Ｒｏｂｏｔｉｃｓ　Ｘ機械人實驗室新一代居家服務
機械人「小五」，集合前幾代研發核心能力，融合四腿輪足複合設計、大面積觸覺皮膚、多指靈
巧手以及安全人機物理交互等多項自研技術。具備多模態交互能力和自我收納功能，並能通過高
頻、低延遲全域定位同建圖（ＳＬＡＭ）系統感知環境，實現精準避障同安全交互。
　
　　「小五」屬於兩手四足設計，亦可以切換四輪模態、兩輪模態運動，喺四輪模態可按不同負
載需求和環境空間，通過交叉腿設計，擴大和縮小支撐空間。遇到唔平整嘅地形，可伸縮直線腿
配合主動力控，實現彈簧懸掛效果，從而令上半身平穩。而且「小五」具備多種實用功能，可以
取快遞、幫助老人起床並陪同參與活動。
　
　　目前內地已有養老機器人番工：餵食機器人可以照護失能老人進食，仲可以智慧捕捉老人嘴
部變化，持續或停止餵食；智慧照護機器人能監測老人嘅身體健康數據，２４小時照顧老人；洗
浴機器人能幫助臥床癱瘓老人解決洗澡問題，大大降低了老人在浴室跌低嘅風險。而相關上市公
司目前正積極發展康復機器人、行走機器人等。
　
　　騰訊首席科學家張正友指，研發養老型協作機械人係探索未來前沿技術，具身智能係人工智
能嘅下一波浪潮，發展足夠智能居家服務機械人，將會係一個造福全人類科技大方向。目前已同
內地數十家機械人企業開展合作交流。
　
　　現時內地ＡＩ同機械人發展一日千里，只要養老機械人順利運作，相信一般家務機械人都好
快推出，「小六」、「小七」陸續有來。到時有望取代家務姐姐嘅工作、可以幫手接送小朋友返
學、煮飯、清潔家居等，遲早取代家務姐姐嘅工作。睇嚟家務姐姐今次唔止遇到對手咁簡單，仲
係有一個有兩對腳嘅對手。再咁落去，唔好話家務姐姐飯碗不保，遲早連筆者個飯碗都保唔住，
到時大家睇到嘅小傳日記隨時係ＡＩ機械人寫都唔定，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。