《小傳日記》比亞迪天神之眼搶灘低價智駕，對手面臨割肉困境？

　　《小傳日記》噚晚比亞迪（０１２１１）嘅發布會大家有冇睇啊？話係話新品發布，但比亞
迪智駕系統都唔係新鮮嘢啦，重點就係將天神之眼分成Ａ、Ｂ、Ｃ三個版本，分別對應比亞迪全
系高、中、低三檔車型，而Ｃ版即係三目版本（ＤｉＰｉｌｏｔ　１００）主要適配於售價２０
萬人仔以下嘅車型，亦即係秦、宋、漢之類嘅王朝系列，以及海鷗、海豚、海豹之類嘅海洋系列
，而市面上要玩到智駕嘅車型最起碼要廿萬以上，所以比亞迪開發嘅低價智駕車市場，暫時冇對
手，難怪一班車企同行股價反應咁震撼啦。
　
　　比亞迪所謂嘅「智駕平權」，其實就係向全汽車行業下嘅一封「戰書」，可以話係「行業清
洗行動」！ＣＥＯ王傳福大力宣傳「智駕會成為好似安全帶咁嘅標配」，以後啲新能源車冇智能
駕駛傍身，都唔好意思攞出嚟賣喇。之不過，智駕技術嘅運營係需要算力支持，如果連７萬人仔
嘅經濟實惠車型都有得用，其他競爭對手一係就要硬住頭皮跟上，一係就要諗下轉型。
　
　　比亞迪搶灘自研智駕，其中一個主要對手就係喺唔同車企都有布局嘅華為，一向語出驚人嘅
華為常務董事、智能汽車解決方案ＢＵ董事長余承東今朝就話，勉強可以用唔等於好用兼安全，
仲強調華為鴻蒙智行先係斷代領先，明顯話中帶骨啦。話時話，華為職場內捲行內行外都出晒名
，而比亞迪都不遑多讓，前排甚至要逼供應商都「捲」埋一份，另外智駕市場仲有一大批科企等
著搶肉，後事發展還看「捲王大對決」。
　
　　有傳聞話，比亞迪之前嘅智駕功能飽受揶揄，「人工智障」案例百出，甚至有車主使用自動
泊車結果撞牆，智駕功能開啟率不到２０％。知恥後勇，比亞迪大捲特捲，最終先於其他公司推
出「智駕平權」。比亞迪技術發展最大優勢在於其一年賣出幾百萬部車，日日喺度收集數據，
ＡＩ餵得飽，個系統咪越嚟越醒，但新勢力車企累計交付量超過５０萬已經係行業領先，想搞平
價嘅純視覺版本又點搞得起？激光雷達嘅安全價值當然更高，但又不得不向成本效益低頭。
　
　　比亞迪另一個殺著就係成本屠刀，乜都自己搞掂，晶片自研零件自研，咁咪可以將成本壓到
最低囉，據報比亞迪用嘅係平靚正「三目鏡頭＋４Ｄ雷達」，較行業平均水平最多降六成成本，
等於逼競爭對手割肉求生。
　
　　中信証券預期，喺比亞迪嘅帶動下，Ｌ２＋級別嘅智能駕駛汽車銷量會快速從１００萬輛提
升到１０００萬輛級別。根據高工智能汽車研究院負責人鄭利瑤嘅講法，比亞迪２０２５年嘅目
標係，超過６０％嘅車型都會搭載高速ＮＯＡ及以上嘅智駕技術。如果佢哋真係做到呢個數，咁
就等於一年賣超過３００萬部有高階智駕嘅車！不過要講到「全民智駕元年」來到又有啲早，如
果比亞迪天神之眼實測效果未夠神，開啟率低迷，咁比亞迪就真係賠了夫人又折兵，講番股價，
比亞迪Ｈ股升破頂後就冇咩力，不妨等回調再部署，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。