《小傳日記》小米未見「接入ＤｅｅｐＳｅｅｋ」，密謀做大事？

　　《小傳日記》ＡＩ熱潮席捲神州，連阿爺都要抓緊科技發展機遇，開個座談會向外界表明決
心，而且唔理新人舊人，搞到科技就係有用之人。當日座談會一眾科技大佬嘅排位大家都議論紛
紛，坐喺第一排正中央嘅竟然係最後生嘅宇樹科技創辦人王興興，唔少投資者爭相想入股宇樹，
但據講都係一股難求，皇帝女唔憂嫁。
　
　　所以喺ＡＩ嘅世界，雖然大模型學習需時，但只要有方法達到目標，遲來都可以先上岸，好
似ＤｅｅｐＳｅｅｋ嘅奇蹟就顛覆咗ＡＩ研發嘅時間定律。而ＤｅｅｐＳｅｅｋ嘅其中一位幕後
功臣羅福莉，被神州網絡稱為「ＡＩ天才少女」，據報已經轉工，無得同ＤｅｅｐＳｅｅｋ共富
貴。
　
　　不過佢本人都應該「自得其富」，因為盛傳羅福莉係被小米（０１８１０）嘅雷軍以千萬年
薪挖角，但似乎人怕出名豬怕肥，羅福莉就堅拒透露最新去向。羅福莉喺自己嘅微信朋友圈發文
，求網民還自己一個安靜空間，低調做嘢。佢話一早就澄清過自己唔係天才少女，唔想被神化，
「捧得多高摔得多重」，仲話啲借佢嚟炒作流量嘅自媒體，已經打擾到佢屋企人、朋友以至係中
學班主任，佢希望可以「安安靜靜做難而正確的事情」。所以以目前最新消息，羅福莉親屬有向
外提過佢本人已經返緊新工，但新東家小米就無再透露。
　
　　其實夾硬安一個「天才少女」嘅名畀佢都係唔公道，據羅福莉中學班主任透露，佢來自普通
家庭，並唔係大富大貴，佢中學已經係讀拔尖嘅班別，北京師範大學畢業後保研進入北京大學，
隨後已經獲各大ＡＩ龍頭包括巴巴（０９９８８）、ＱＱ（００７００）、百度（０９８８８）
等等ｏｆｆｅｒ，最終就入咗阿里達摩院做佢第一份工。成個過程其實都見到佢所付出嘅努力，
如果用「天才」就總括一個人嘅努力，都難免過於籠統。
　
　　所以到而家都無一絲消息可以確認羅福莉係咪去咗小米，但以公司行動嚟睇，巴巴、ＱＱ以
至百度都認低威接入ＤｅｅｐＳｅｅｋ，而此前豪言要開發大模型嘅小米，至今都未公布過任何
「接入ＤｅｅｐＳｅｅｋ」嘅消息，即係證明小米大有決心，自行研發嘅ＡＩ係有具備比肩
ＤｅｅｐＳｅｅｋ，甚至係超越ＤｅｅｐＳｅｅｋ嘅質素。假如請到ＤｅｅｐＳｅｅｋ嘅其中一
位功臣入麾下，咁又的確係可以定過抬油嘅，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。