《小傳日記》禁出口又升加關稅又升，中芯同哪吒一樣打不死？

　　《小傳日記》內地動畫片《哪吒之魔童鬧海》（又稱哪吒２）近期熱爆，據報票房已高達
１２３億人仔，成功登頂成為全球動畫電影票房之冠，並已躋身全球電影史上最高票房第八位，
轟動影視文化界，可以話系繼ＤｅｅｐＳｅｅｋ震驚全球政經及科技界之後，內地又鉅獻，厲害
厲害！
　
　　哪吒手持火尖槍，腳踏風火輪，畀人印象好打得。但原來魚缸都有唔少好似哪吒咁打得嘅股
份。好似晶片股龍頭中芯（００９８１）咁，破完頂再破頂，今日大市回跌，中芯逆市照升最多
８％。
　
　　點解中芯咁好打？咪多得花旗國囉！事關侵侵又出招，話對入口晶片徵關稅。咁就奇啦，舊
年拜登要禁止高端晶片出口到內地，晶片股就炒作國產自主生產概念，股價係咁升。但今次情況
唔同，花旗國今次係徵收晶片入口關稅，對晶片企業嚟講，照計點都係負面消息，點解股價一樣
升？
　
　　筆者參考市場分析，不外乎話有望加快中國半導體產業鏈國產替代步伐；受惠內地政策支持
，需求回暖；同埋ＤｅｅｐＳｅｅｋ崛起，國內全功能ＧＰＵ對複雜ＡＩ任務嘅支持能力將得到
驗證同優化，有助於國內ＡＩ全產業鏈發展云云。
　
　　呢啲睇法都算正路，筆者明曬！只不過，股價升幅真係唔講得笑。中芯舊年２月初股價低位
１３﹒８８銀，今日收市５１﹒８銀，大約一年左右，股價升咗２﹒７倍，預測市盈率飆至
１１０﹒６倍。股價貴唔貴真系見仁見智，關鍵係，未來業績跟唔跟得上股價升幅？
　
　　中芯國際聯合首席執行官趙海軍早前喺業績會上表示，喺國家刺激消費政策紅利帶動下，今
年首季淡季「不淡」，惟擔心會導致下半年缺乏訂單，行業因而降價，相信下半年平均銷售將呈
下降趨勢。摩通上周亦發表報告，指從２０２５年第２季開始，中芯連續增長動力可能有所減弱
。定價可能會變得更加困難，從而使毛利率保持在２０％以下水平，將評級由「中性」降至「減
持」。另一大行瑞穗則維持跑輸大市評級。
　
　　中芯股價近期係咁升，北水功不可沒，過去幾個月，北水持續大量湧入。究竟係投資者睇好
中芯發展前景，定係投機者睇好炒作錢景？筆者唔敢講。不過，巧合嘅係，每次花旗國出招打壓
，中芯股價多數升。
　
　　哪吒２噚日開始喺香港上畫，筆者仲未睇，聽講之所以咁多人捧場，除咗視覺效果外，劇情
特別感人。內容講述哪吒點樣歷經重重困難，同敵對勢力對抗到底，顯示出打不死嘅精神。咁就
難怪花旗國今日話徵晶片入口稅，中芯又再被炒起，好似成為對抗花旗國嘅象徵。只要花旗國打
壓神州之心不死，中芯只會愈戰愈勇。睇嚟中芯股價，同哪吒票房一樣，好難估頂。至於仲有幾
多上升空間？就真系視乎大家嘅想像空間有幾多啦！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。