《小傳日記》百度再攻ＡＩ社交！十萬億美金市場到手定再衰多次？

　　《小傳日記》魚缸日日炒ＡＩ炒到熱火朝天，但百度（０９８８８）似乎冇乜份參與，無辦
法啦，坊間針對問答式ＡＩ有各式各樣嘅排行榜，文心一言永遠係陪跑，連蘋果都要敬而遠之，
咁市場自然唔摻你玩。唔緊要嘅，玩唔到高端咪玩低端囉，百度最近就偷偷地推出咗一個情感陪
伴類ＡＰＰ，叫做「月匣」。呢個ＡＰＰ主打兩大賣點，高自由度嘅ＡＩ對話同埋沉浸式劇本互
動，即係升級版嘅ＡＩ　Ｃｈａｔｂｏｔ囉，不過你又唔好睇少佢，國外同行「
ｃｈａｒａｃｔｅｒ　ＡＩ」喺全球最受歡迎ＡＩ　Ａｐｐ可以排到前十名。
　
　　每個「月匣」入面嘅角色都有自己獨特嘅人設，好似其中一個角色深夜麵館老闆娘張嬌就有
晒完整人設：２０年前為咗供細佬上大學，隻身入城打工，經歷過工場機器嘅轟鳴，捱過工棚嘅
寒冷，之後經營呢間深夜麵館已經有十年。」你當然可以覺得呢啲人設好過時，但係對於讀書唔
多嘅工廠打工子弟嚟講，話唔定好有吸引力。
　
　　時下短劇正流行，就算劇情再騎呢布景再簡陋，一樣有大把人喺地鐵度追，如果利用ＡＩ技
術令用家做埋短劇男女主角，都係一種商機。月匣提供沉浸式劇情闖關，例如後宮、穿越、玄幻
等等，最貼地嘅劇情就好似「春節反擊戰」，你嘅虛擬姑媽「王秀芬」就會喺你嘅手機ｍｏｎ入
面問長問短，你就要通過對話反擊對方，仲要反手追問對方人工幾多，咁先可以闖關成功！如果
你覺得呢個劇本唔夠吸引，仲可以好似碌ｒｅｅｌ咁，向上劃走直接切換去下一個劇本。
　
　　根據ＳｏｃｉａｌＢｅｔａ嘅分析，２０２４年全球ＡＩ情感伴侶市場規模已經突破咗１０
億美元，而神州因為有龐大嘅年輕用戶群體，成為增長最快嘅區域之一。有分析人士話：「月匣
其實並唔係一個單純嘅社交產品，而係百度喺下一代人機交互入口嘅卡位戰。」只不過ＡＩ情感
伴侶就好難避免到敏感話題，當然以國內嘅尺度當然係嚴防死守啦，所以要同海外產品競爭，行
正經路線嘅月匣就好難出線。
　
　　今日已經係百度第四次衝擊ＡＩ社交產品，究竟ＡＩ互動效果好唔好就有待市場驗證，不過
筆者就希望一點，如果用家對住虛擬人物講出佢嘅小秘密，百度要記得保護好用戶私隱，唔好通
過虛擬麵館老闆娘或者虛擬姑媽向對方ｓｅｌｌ產品啦，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。